Ra’iisul Wasaare Rooble Oo Ku Wajahan Magaalada Baydhabo Iyo Ujeedkiisa

Ra’iisul Wasaaraha Xukuumadda Federaalka Soomaaliya Maxamed Xuseen Rooble iyo wafdi uu hoggaaminayo ayaa Maanta waxaa ay ku wajahan yihiin Magaalada Baydhabo ee Caasimadda KMG u ah maamulka Koonfur Galbeed.

Socdaalka Ra’iisul Wasaare Rooble ee Baydhabo ayaa waxaa ku wehlin doona xubno ka tirsan Golihiisa Wasiirada iyo Mas’uuliyiin ka tirsan dowladda Federaalka, iyagoo saacadaha soo socda tegi doona halkaas.

Ujeedka safarkiisa ayaa la xiriira arrimaha doorashooyinka, inkastoo muran weyn uu ka taagan yahay dhismaha Guddiyada doorashooyinka ee Xukuumadda Federaalka ay magacaawday, kaasoo ay ka soo horjeesteen Musharaxiinta mucaaradka.

Magaalada Baydhabo ee Xarunta Gobolka Baay ayaa waxaa ka socota qaban-qaabada soo dhaweynta Ra’iisul Wasaare Maxamed Xuseen Rooble iyo wafdiga la socda, waxaana meelaha qaar lagu xad-dhafay Sawiradda Rooble.

Waa safarkii ugu horreeyay ee Ra’iisul Wasaaraha Federaalka Soomaaliya Maxamed Rooble uu ku tegayo gudaha dalka gaar ahaan Baydhabo tan iyo markii bishii September loo magacaabay xilka Ra’iisul Wasaaraha.

Ammaanka guud ee Magaalada Baydhabo ayaa Maanta siweyn loo adkeeyay, waxaana suura-gal ah in halkaas ay wafdi hordhac u ah safarka RW Rooble iyo Ilaaladiisa gaarka ah si loo xaqiijinayo sugiga amniga Magaalada.